Shkup: Parada e Krenarisë do të mbahet më 21 qershor, në vend të festës, do të protestohet

Eventi do të fillojë në orën 18:00 në Parkun “Gruaja Luftëtare”, dhe marshimi do të niset në orën 19:00 nga Parlamenti, me ndalesa përpara Ministrisë së Arsimit dhe Shkencës dhe Qeverisë.

“Ky slogan nuk është i rastësishëm – ai mbart përvojën tonë të mbijetesës, por edhe vendosmërinë tonë, jo vetëm për të mbijetuar, por për të mbijetuar së bashku. Në një kohë presionesh politike, gjuhe urrejtjeje, heshtjeje institucionale dhe padrejtësie globale, përgjigjja jonë është bashkimi, solidariteti dhe kujdesi radikal. Ne protestojmë sepse duam të jetojmë në një shoqëri në të cilën trupat, dashuria dhe identitetet nuk do të konsiderohen kërcënim”, tha Lila Milić, një aktiviste për të drejtat e transgjinorëve.

Aktivisti Stefan Petrovski vuri në dukje se parada e këtij viti nuk do të ketë një program argëtues.

“Kemi vendosur që nuk ka asgjë për të festuar. Nuk ka vend për performancë dhe shpërqendrim nga realiteti. Sidomos jo në një kohë kur qeveria po investon në rrënim shoqëror, në vend të kulturës. Marshimi ynë mbetet i zhurmshëm dhe i vendosur, sepse parada në vendin tonë nuk është një festival, por një protestë”, tha ai.

Drejtoresha Ekzekutive e Komitetit të Helsinkit, Uranija Pirovska, paralajmëroi se komunitetet e margjinalizuara përjashtohen gjithnjë e më shumë.

“Kemi shumë për të protestuar këtë vit. Bota, për fat të keq, në vend që të përparojë të drejtat e njeriut, po i kthen ato prapa – dhe e gjithë kjo reflektohet në të gjitha proceset që po ndodhin në vendin tonë”, tha ajo.

“Skopje Pride” mbahet që nga viti 2019 dhe synon të promovojë dukshmërinë, të drejtat dhe dinjitetin e komunitetit LGBTI+, si dhe të inkurajojë mbështetje dhe solidaritet më të gjerë shoqëror.